ஆடல் கலை / பரதம்

ஆரம்ப கால மக்கள் அதிக துயரத்தில் ஆழ்ந்து கிடந்தனர். இந்நிலை மாறி எங்கும் இன்பம் உண்டாகும் வண்ணம், அனைவரும் புரிந்து கொள்ளுமாறு நான்கு வேதங்களில் இருந்து ஒரு பொழுதுபோக்கை உருவாக்குமாறு இந்திரன் பிரம்மாவை வேண்டினார். இதற்கமைய இருக்கு வேதத்தில் இருந்து நாட்டியத்தையும், யசூர் வேதத்திலிருந்து அபிநயத்தையும், சாம வேதத்திலிருந்து இசையையும், அதர்வ வேதத்திலிருந்து ரசத்தினையும் தொகுத்து ஐந்தாம் வேதமாக பரத நாட்டியக்கலையினை படைத்தார்.

பரத நாட்டியத்தில் பாடலின் பொருளைக் கைமுத்திரைகள் காட்டும். கை முத்திரைகள் வழி கண் செல்லும். கண்கள் செல்லும் வழி மனம் செல்லும். மனம் செல்லும் வழி உள்ளத்தின் உணர்வு செல்லும். முன்பு இது கோவில்களில் மத வழிபாடுகளின் போது கோவில் நடனக் கலைஞர்களால் நிகழ்த்தப்பட்டது. 18ஆம் நூற்றாண்டிலிருந்து  தமிழ்நாடு மற்றும் கர்நாடகா மாநிலங்களின் நடனப் பாணி பரதநாட்டியம் என்று அறியப்பட்டது.

பரதநாட்டியம் என்பது பாவம், ராகம், தாளம் , முத்திரைகள் மூலம் கலைஞர்களின் உணர்வுகளையும், கதாபாத்திரங்களின் கருத்துக்களையும் பார்வையாளர்களுக்கு உணர்த்தும் உடல் மொழி. நடன நடை என்பது தாள நடன நுட்பம் மற்றும் நடிப்பு ஆகியவற்றின் தொகுப்பாகும். எந்தவொரு கலைவெளிப்பாடும் உணர்ச்சிகளின் உந்துததால் உருவானதே. எவ்வாறாயினும் அது நமது வாழ்வியலையும் அது சார்ந்த உன்னதமான கருத்தியலையும் வெளிப்படுத்த வேண்டும். மரபு வழி ஆடல் கலையும், (பரதமும்) தமிழர் வாழ்வியல் சார்ந்த தொன்மையான கருத்துக்களை தன்னகத்தே கொண்டுள்ளது.